Lev 10 | NdeIBE | STEP | Amadodana ka-Aroni uNadabi lo-Abhihu bathatha iziphathelo zempepha, bafaka umlilo kuzo, bafaka impepha; basebenikela ngomlilo phambi kukaJehova ngokungekho emandleni abo, njalo kuphambene lomlayo wakhe.

Leviticus 10

Isono sikaNadabi lo-Abhihu

1 Amadodana ka-Aroni uNadabi lo-Abhihu bathatha iziphathelo zempepha, bafaka umlilo kuzo, bafaka impepha; basebenikela ngomlilo phambi kukaJehova ngokungekho emandleni abo, njalo kuphambene lomlayo wakhe. 2 Kwavela umlilo lapho uJehova ayekhona wabatshisa bafa phambi kuka Jehova.

3 UMosi wasesithi ku-Aroni, “Lokhu yikho okwakhulunywa nguJehova aze athi, “ ‘Kulabo abasondela kimi Ngizazibonakalisa ngingcwele, Ngizadunyiswa phambi kwabo bonke abantu.’ ” U-Aroni wala ethule.

4 UMosi wabiza uMishayeli lo-Elizafani amadodana kamalumakhe ka-Aroni u-UZiyeli, wathi kubo, “Wozani lapha lizothwala abafowenu libakhuphele phandle kwezihonqo khatshana laphambi kwendlu engcwele.” 5 Ngakho beza babathwala, belokhu begqoke amabhatshi abo, babakhuphela ngaphandle kwezihonqo njengokulaya kukaMosi.

6 UMosi wasesithi ku-Aroni lakumadodana akhe u-Eliyazari lo-Ithamari, “Lingaze layekela inwele zenu zingakanywanga njalo lingaze ladabula izigqoko zenu ngokuhlulukelwa, funa liye life, loNkulunkulu athukuthelele abantu bonke. Kodwa zonke izihlobo zenu lendlu yonke ka-Israyeli, ingabakhalela labo ababhujiswe nguJehova ngomlilo. 7 Lingaze lasuka esangweni leThente lokuHlanganela funa life, ngoba amafutha kaJehova okugcobela esikhundleni aphezu kwenu.” Ngakho benza njengokulaya kukaMosi.

8 UJehova wasesithi ku-Aroni, 9 “Wena lamadodana akho akumelanga linathe iwayini loba okunye okunathwayo okubilileyo nxa lisiyangena eThenteni lokuHlanganela, funa life. Lo ngumlayo omi kuze kube nininini kuzizukulwana ezizayo. 10 Kumele lahlukanise okungcwele kokungangcwele, okuhlanzekileyo kokungahlanzekanga, 11 njalo kumele lifundise abako-Israyeli zonke izimiso uJehova abaphe zona ngoMosi.”

12 UMosi wathi ku-Aroni kanye lamadodana akhe aseleyo, uEliyazari lo-Ithamari, “Thathani umnikelo wamabele oseleyo eminikelweni eyenzelwe uJehova ngomlilo liwudle ungelamvubelo eceleni kwe-alithare ngoba ungcwele kakhulu. 13 Udleleni endaweni engcwele, ngoba uyisabelo senu kanye lamadodana enu somnikelo owenzelwe uJehova ngomlilo; ngoba ngilayiwe ngokunjalo. 14 Kodwa wena lamadodana akho kanye lamadodakazi akho lingadla isifuba esazunguzwayo kanye lomlenze owethulwayo. Kudleleni endaweni ehlanziweyo ngokomkhuba; kuphiwe wena kanye labantwana bakho njengesabelo somnikelo wobudlelwano kwabako-Israyeli.

15 Umlenze owanikelwayo kanye lesifuba esazunguzwayo kumele kulethwe kanye lamahwahwa anikelwa ngomlilo, azozunguzwa phambi kuka Jehova njengomnikelo wokuzunguzwa. Lokho kuzakuba yisabelo sansuku zonke esakho kanye labantwabakho, njengokulaya kuka Jehova.”

16 UMosi wathi ebuza ngembuzi yomnikelo wesono wathola ukuthi yayisitshisiwe, wabathukuthelela o-Eliyazari lo-Ithamari, amadodana ka-Aroni ayesesele, wababuza wathi,

17 “Kungani lingadlelanga umnikelo wesono endlini engcwele na? Ungcwele kakhulu; lawuphiwa ukuze ususe icala labantu ngokwenza ukuthi babuyiswe phambi kuka Jehova. 18 Njengoba igazi lawo lingangeniswanga eNdaweni eNgcwele, bekumele imbuzi liyidlele endlini engcwele njengokulaya kwami.”

19 U-Aroni waphendula uMosi wathi, “Lamuhla benze umhlatshelo womnikelo wesono kanye lomnikelo wokutshiswa phambi kukaJehova, kodwa izinto ezinjengalezi sezenzakele kimi. Aluba bengidle umnikelo wesono lamuhla, kambe uJehova ube ngachelesa ngalokho na?” 20 UMosi waba lokusuthiseka ekuzwa lokho.